నేటి వేగంగా మారుతున్న జీవన విధానంలో ఉద్యోగులపై ఒత్తిడి పెరుగుతోంది. ఎక్కువసేపు పనిచేయడం వల్ల వారు కుటుంబంతో గడిపే సమయం తగ్గి, మానసిక, శారీరక ఆరోగ్యంలో సమస్యలు ఎదుర్కొంటున్నారు. వర్క్-లైఫ్ బ్యాలెన్స్ నష్టం కలిగించే పరిస్థితులు చాలా మంది ఉద్యోగులు ఎదుర్కొంటున్నారు. ఈ నేపథ్యంలో, కుటుంబానికి సమయం కేటాయించడం, ఆరోగ్యాన్ని కాపాడుకోవడం ముఖ్యం అని కొందరు భావిస్తున్నారు.

ఒక ప్రముఖ ఉదంతం ఇటీవలి కాలంలో వెలుగులోకి వచ్చింది. శ్రేయస్ అనే ప్రాడక్ట్ డిజైనర్, ఉద్యోగంలో చేరిన మొదటి రోజే రాజీనామా చేశాడు. శ్రేయస్ కొత్త కంపెనీలో చేరిన మొదటిరోజు హుషారుగా పని ప్రారంభించినప్పటికీ, కంపెనీ మేనేజర్ అతనిపై తీవ్రమైన ఒత్తిడిని తెచ్చాడు. 12 నుంచి 14 గంటలు పని చేయాలని, ఈ పని పద్ధతి ప్రతి రోజూ అలాగే ఉంటుందని చెప్పడంతో శ్రేయస్ ఒత్తిడిని తట్టుకోలేకపోయాడు. తన వ్యక్తిగత జీవితానికి సమయం కేటాయించలేనని, 9 గంటలు మాత్రమే పనిచేస్తానని చెప్పినప్పటికీ, మేనేజర్ అతనిపై అనుచితంగా ప్రవర్తించి, ఆఫీసులో అపహాస్యం చేశాడు. చివరికి శ్రేయస్ ఆ ఒత్తిడిని తట్టుకోలేక రాజీనామా చేసాడు.

తన రాజీనామా లెటర్‌ను సోషల్ మీడియా ప్లాట్‌ఫామ్ రెడ్డిట్‌లో పోస్ట్ చేయగా, అనేక నెటిజెన్ల మద్దతు లభించింది. చాలామంది కూడా ఇలాంటి పరిస్థితులు ఎదుర్కొన్నామని చెప్పగా, మరికొందరు శ్రేయస్ నిర్ణయాన్ని ప్రశంసించారు. ఒకప్పుడు పనిపై మాత్రమే దృష్టి సారించే ప్రవర్తన ఇప్పుడు చాలా మంది జీవితాలకు చెడు ప్రభావం చూపిస్తుందని అభిప్రాయపడ్డారు.

ఇక, మరో ఉదంతంలో దేవ్ కటారియా అనే మార్కెటింగ్ ప్రొఫెషనల్ తన స్నేహితుడి గురించి సోషల్ మీడియాలో పోస్ట్ చేశాడు. దేవ్ స్నేహితుడు రెండు ఉద్యోగ ఆఫర్లు పొందాడు. ఒక కంపెనీ రూ. 23 లక్షలు జీతం ఇవ్వగలదని ప్రకటించగా, మరొక కంపెనీ రూ. 18 లక్షలు జీతం ఆఫర్ చేసింది. ఆశ్చర్యకరంగా, తక్కువ జీతం ఉన్న ఆఫర్‌ను ఆయన ఎంచుకున్నాడు.

అయితే కారణం విన్న తరువాత దేవ్ కటారియా కూడా తన స్నేహితుడి నిర్ణయాన్ని సరైనదని అంగీకరించాడు. 23 లక్షల జీతం ఆఫర్ చేసే కంపెనీ వారానికి 6 రోజులు పనిచేయాలని షరతు విధించింది, ఇక వర్క్ ఫ్రం హోమ్ సౌకర్యం లేదు. కానీ, 18 లక్షల జీతం ఆఫర్ చేసే కంపెనీ వారానికి 5 రోజులు మాత్రమే పని చేయించేసరికి, హైబ్రిడ్ విధానం అమలు చేస్తూ, వర్క్ ఫ్రం హోమ్ ఆప్షన్ కూడా ఉంది. ఈ ఆఫర్ ద్వారా తన స్నేహితుడు కుటుంబానికి, ఆరోగ్యానికి సమయం కేటాయించవచ్చని దేవ్ కటారియా వివరించాడు.